அலெக்சா, நீ என்ன ஒட்டுக் கேட்கிறாய்?

அமேசான் நிறுவனம் சில மாதங்களுக்கு முன் ஒரு விளம்பரம் வெளியிட்டது. அலெக்சா – டிஜிட்டல் உதவியாளர் – பற்றிய விளம்பரம் அது. அலெக்சாவுக்கு குரல் போய்விட்டது. தற்காலிகமாகப் பேச முடியவில்லை என்பது போன்ற சித்தரிப்பு. நிறைய பிரபலங்கள் இந்த விளம்பரத்தில் நடித்திருந்தனர் – அமெசானின் சீ ஈ ஓ ஜெஃப் பெஸோஸ் உட்பட.

அந்த விளம்பரம் அலெக்சா என்ன பேச முடியும் என்பதைப் பற்றியதாக இருந்தாலும் – நிறைய டிஜிட்டல் உதவியாளர்கள் ஸ்மார்ட் ஸ்பீக்கர்கள் மூலம் நம் வீட்டிற்குள் வந்துவிட்ட இந்தக் கால கட்டத்தில், முக்கியமான கேள்வி, அலெக்சாவால் நாம் பேசுவதிலிருந்து என்னவெல்லாம் ஒட்டுக் கேட்டுத் தெரிந்து கொள்ள முடியும் என்பதே.

அமெசானும் கூகுளுமே இன்றைய நிலையில் இது போன்ற சாதனங்கள் விற்பனையில் முன்னோடியாக இருக்கின்றன. அவர்கள் சொல்வது என்னவென்றால்: நீங்கள் “ஹே அலெக்சா” என்றோ “ஓகே கூகுள்” என்றோ சொன்ன பிறகே, நீங்கள் பேசுவதைக் கேட்டுப் பதிந்து கொள்ள ஆரம்பிக்கும் என்று கூறுகின்றனர்.

ஆனால் இவர்கள் விண்ணப்பித்துள்ள – பெரும்பாலும் நிலுவையிலுள்ள – காப்புரிமைகள் (patent) இந்த மாதிரியான சாதனங்கள் நம் பேசும் பேச்சுக்களையும் செய்யும் செயல்களையும் கண்காணிக்கவும் கேட்கவும் முடியும் என்று அடிக்கோடிட்டுக் காட்டுகின்றன. இவ்வாறு சேகரிக்கபடும் விசயங்களால், அந்த நபர்களின் ஆசைகளையும் விருப்பங்களையும் கண்டுபிடித்து, பிறகு அதை விளம்பரங்களுக்கும், அந்த நபர்கள் வாங்குவதற்கு பொருட்களைப் பரிந்துரை செய்யவும் உபயோகப்படுத்திக் கொள்ளலாம்.

ஒரு காப்புரிமை விண்ணப்பத்தில் அமெசான், தனது குரல் தெரிவு அல்காரிதத்தை எப்படி டேப்லட், ஈ புக் ரீடர்ஸ் (கிண்டில்?) போன்றவற்றில் பயன்படுத்தி, அதை பயன்படுத்துபவர்கள் பேசுவதை லைவ்வாக கண்காணித்து, அவர்கள் love, bought, like போன்ற வார்த்தைகளைப் பயன்படுத்தும் பொழுது பதிவு செய்யப்பட்ட பேச்சுகளை எப்படி ஆய்வு செய்து அந்த டேட்டாவைப் பயன்படுத்தும் என்று விவரித்திருக்கிறது. அந்த விண்ணப்பத்தோடு இணைக்கப்பட்ட ஒரு வரைபடத்தில் எப்படி இரு நண்பர்களுக்குள்ளான தொலைபேசி உரையாடலின் முடிவில் ஒருவர் சான் டியாகோ ஜூவுக்கு டிக்கெட்டுக்கான அஃபரையும் மற்றொருவர் மதாந்திர வைன் க்ளப் மெமர்ஷிப்பிற்கான விளம்பரத்தையும் காண்பார்கள் என்று விவரித்திருக்கிறது.

கூகுளின் (ஸ்மார்ட் ஹோம் சாதனங்கள் தயாரிக்கும் நெஸ்ட் லேப்ஸின் உரிமையாளர்) சில காப்புரிமை விண்ணப்பங்களில் இவ்வாறு சொல்கிறது: ஒலிகளை மானிட்டர் செய்வதன் மூலம் ஒரு குழந்தையை அது செய்யும் சேட்டைகளைக் கண்கானிக்க முடியும் என்கிறது. பேச்சை வைத்து முதலில் குழந்தை இருக்கிறது என்று கண்டுபிடித்து பிறகு பேசுகிற தொனியை வைத்து எச்சரிக்கை கூட செய்யமுடியும் என்கிறது.

வேறு ஒரு விண்ணப்பத்தில் தனி நபர்களுக்கு தகுந்தார்போல தகவல்கள் தரும் நோக்கில் பேசுபவரின் மனநிலையை “அவருடைய பேச்சின் சத்தத்தை வைத்தும், அவர் சுவாசத்தை வைத்தும், அழுகையை, இன்னும் பிறவற்றை வைத்தும்” பேசுபவரின் உடல் நலத்தை “அவர் இறுமுகிறாரா தும்முகிறாரா போன்றவற்றை வைத்து” கண்டுபிடிக்க முடியும் என்கிறது.

அதே விண்ணப்பத்தில், ஒரு நபரின் வீட்டில் கீழே கிடக்கும் டீ சர்ட்டில் இருக்கும் வில் ஸ்மித்தின் படத்தை கண்டுகொண்டு அந்த நபர் வில் ஸ்மித்தை இணையத்தில் தேடிய வரலாறை வைத்து, “இந்தாப்பா தம்பி, உனக்கு வில் ஸ்மிதைப் பிடிக்கும் போலத் தெரியுது, உங்க பக்கத்து தேட்டர்ல புதுசா வில் ஸ்மித் படம் ஓடிட்டிருக்கு, ஓடிப் போய் பாரு” என்று சொல்ல முடியும் என்கிறார்கள்.

அமசானும் கூகுளும் எங்களுக்கு வாடிக்கையாளர்களின் ப்ரைவசி முக்கியம், அவர்களின் ப்ரைவசியே முக்கியம் என்று சொல்லி வருகின்றன.

ஆப்பில் தன் பங்குக்கு ஹோம் பாட் என்கிற வஸ்துவை அறிமுகம் செய்திருக்கிறது. ஃபேஸ்புக் இந்த மே மாதத்தில் இது போன்ற ஒரு வஸ்துவை அறிமுகம் செய்யலாம் என்று ப்ளூம்பர்க் சொல்லுகிறது.

கூகுளும் அமசானும் இந்த சாதனங்களைப் பயன் படுத்துவோரின் அனுமதியின்றி (அவர்கள் கூப்பிட்டோ அல்லது பட்டனை அமுக்கியோ) எதையும் பதிவு செய்ய மட்டோம் என்கிறது. மேலும் பதிவு செய்ததை இணையத்துக்கு அனுப்பும் பொழுது (streaming) லைட் எரிந்து கொண்டிருக்கும் அதனைப் பார்த்து நீங்கள் உஷாராகிக்கொள்ளலாம் என்கிறது. மேலும் இணையத்தில் இருக்கும் பதிவுசெய்யப்பட்ட குரல்களை நீங்கள் எப்பொழுது வேண்டுமென்றாலும் டெலீட் செய்யலாம் என்றும் கூறுகிறது.

அமசான் நாங்கள் ஒரு போதும் பதிவுப் செய்த பேச்சுகளை வேறு கம்பெனிகளுக்கு கொடுக்க மாட்டோம் என்கிறது. கூகுள் பொதுவாக உங்கள் பேச்சுகளை நாங்கள் வேறு கம்பெனிகளுக்கு கொடுக்க மாட்டோம் ஆனால் எழுத்து வடிவத்தில் கொடுப்போம் என்கிறது.

The Electronic Privacy Information Center, இணையத்தில் இணைந்திருக்கும் சாதனங்களுக்கு இன்னும் கடினமான விதிகள் வகுக்கப்பட வேண்டும் என்கிறது. தகவல்கள் எப்படி சேகரிக்கப்படுகின்றன, சேகரிக்கப்பட்ட தகவல்களை எப்படி ஆய்வு செய்கின்றனர் என்பதையும் ஆய்வின் முடிவை எப்படி எதற்காகப் பயன்படுத்துகிறார்கள் என்பதையும் தெளிவாக வெளிப்படையாக அறிவிக்க வேண்டும் என்று கூறுகிறது.

டெஸ்லாவிற்கு இந்த வருடம் சோதனைக் காலம்

தொடர்ச்சியாக உற்பத்தி தாமதமாவதால் டெஸ்லாவின் முதலீட்டாளர்கள் நிறுவனத்தின் மீது நம்பிக்கையிழந்து வருகின்றனர்.

சரியாக ஒரு வருடத்திற்கு முன்பு தான் தனது அசுர வளர்ச்சியினால் வாகனத் தொழில் துறையையே முற்றிலும் டெஸ்லா மாற்றப் போகிறது என்று அனைவரும் நினைத்துக் கொண்டிருந்தனர்.

ஆடம்பரக் கார்கள் வாங்குபவர்களிடையே பேட்டரியில் ஓடக் கூடிய டெஸ்லாவின் மாடல் எஸ் ரக செடான் கார் மிகுந்த வரவேற்பைப் பெற்றிருந்தது. அதனுடைய தானியங்கி கார் ட்ரைவிங் சாஃப்ட்வேர் மற்ற போட்டியாளர்களை விட பல மடங்கு சிறந்ததாக இருந்தது. எலான் மஸ்க், டெஸ்லாவின் சி.ஈ.ஓ, இன்னும் விலை குறைந்த மாடல் எஸ் கார்கள் இன்னும் துரிதமாக உற்பத்தியாகி சுற்றுப்புறச் சூழலை கொஞ்சமும் சேதப் படுத்தாமல் (ஜீரோ எமிஷன்) சாலைகளில் ஓடும் என்று கூறியிருந்தார்.

வால் ஸ்ட்ரீட் உணர்ச்சிமிகு எழுச்சி கொண்டது. கார் உற்பத்தியில் நூறாண்டு காலம் பழம் தின்று கொட்டை போட்ட நிறுவனங்களான ஃபோர்ட் மற்றும் ஜெனரல் மோட்டார்ஸை விட சந்தை மதிப்பில் சட்டென உயர்ந்தது டெஸ்லா.

ஆனால் அதற்கப்புறம் சவாரி அவ்வளவு எளிதாக இல்லை!

மாடல் 3இன் அறிமுகம் நிறைய சிறு தவறுகளையும், தாமத்கங்களையும் சந்தித்ததது. எலான் மஸ்க் இதனை “உற்பத்தி நரகம்” என்று எரிச்சலாகக் குறிப்பிட்டார். தானியங்கி கார் தயாரிப்பின் சொல்லிக்கொள்ளும் படியாக முன்னேறாமல், ஒவ்வொறு காலிறுதியிலும் முதலீட்டாளர்களின் பணத்தை வேகமாக இழந்து வருகிறது.

போன வாரம் எரிகிற நெருப்பில் எண்ணெய் ஊற்றியது மூடீஸ் (Moody’s). மூடீஸ், டெஸ்லாவில் கடன் மதிப்பீட்டை தரமிறக்கம் செய்தது. டெஸ்லா பணத்தை தாறுமாறாக செலவழிப்பது கவலையளிக்கிறது என்று காரணம் சொன்னது. ஆனால் ஆய்வாளர்கள் இந்தக் கவலையெல்லாம் ஜுஜூப்பி, டெஸ்லாவிடம் இந்த ஆண்டு இறுதிக்குள் பணம் மொத்தமும் கரைந்துவிடுமே, என்ன செய்வீர்கள் என்று கேள்வி எழுப்புகின்றனர்.

டெஸ்லாவினுடைய ஷேர்கள் கடந்தவார செவ்வாய்க்கிழமை 8 சதவிகதமும் புதன்கிழமை 8 சதவிகிதமும் கீழிறங்கியது. அப்புறம் கொஞ்சம் மீண்டாலும் தனது மதிப்பில் ஏறக்குறைய கால் பங்கை இழந்துவிட்டது. டெஸ்லாவின் பாண்டுகளின் சரிவும் வாங்கிய கடனை டெஸ்லாவால் திருப்பிச் செலுத்த முடியுமா என்கிற கேள்வியை நியாயப்படுத்துகிறது.

டெஸ்லாவின் சமீபத்திய பிரச்சனைகள் அதன் வரவு செலவுக் கணக்குகளையும் தாண்டியது. சமீபத்தில் கலிஃபொர்னியாவில் நடந்த ஒரு கொடூரமான விபத்தில் ஓட்டுனர் உயிரிழந்த விவகாரத்தை ஃபெடரல் போலீஸ் கையிலெடுத்திருக்கிறது. விபத்து சமயத்தில் தானியங்கி (auto pilot) செயல்பாட்டில் இருந்திருக்கக்கூடும் என்று சந்தேகிக்கிறது போலீஸ். ஃப்லோரிடாவில் 2016இல் நடந்த விபத்தில் ஒட்டடுனர் கொள்ளப்பட்ட பொழுது தானியங்கி செயல்பாட்டில் இருந்தது. ஆனால் தானியங்கி மென்பொருளில் குறைகள் இல்லையெனவும் அதைத் தவறாகப் பயன்படுத்துவதிலிருந்து ஓட்டுனரை தடுப்பதில் தான் பிரச்சனை என்று பாதுகாப்பு ஆய்வாளர்கள் முடிவு செய்தனர்.

மேலும் கடந்த வியாழன் அன்று, 2016 ஏப்ரலுக்கு முன் தயாரித்த 123000 மாடல் எஸ் கார்களை, பவர் ஸ்டியரிங் மோட்டாரை அதன் இடத்தில் வைத்திருக்க உதவும் போல்ட்களை மாற்றவேண்டும் என்று கூறி டெஸ்லா திரும்பப்பெற்றுக் கொண்டது. அந்த போல்ட்கள் துருப்பிடித்து உடைந்து போகுமாம், அப்படி உடைந்தால் auto pilot வேலை செய்யாது, ஓட்டுநர் தான் ஓட்ட வேண்டும்.

டெஸ்லாவின் இந்த பிரச்சனைகள் நிறுவனத்துக்கு மட்டுமின்றி அதன் சீ ஈ ஓ எலான் மஸ்க்கிற்கும் பின்னடைவு தான். கனவு கண்டால் மட்டும் போதாது, அந்தக் கனவை உண்மையாக்க எவ்வளவு தூரம் நீங்கள் இறங்கி வேலை செய்யத் தயாராக இருக்கிறீர்கள் என்பது தான் முக்கியம். எலான் மஸ்க் ஒரு தொலைநோக்கு சிந்தனையாளர் என்பதைத் தாண்டி அந்தச் சிந்தனைகளுக்கு செயல் வடிவம் கொடுப்பவராகவும் கருதப்பட்டார். முற்றிலும் புதிய வாகனங்கள் தயாரிக்கும் நிறுவனத்தை உருவாக்கிய சூத்திரதாரி, உலத்திலேயே மிக பெரிய பேட்டரி உற்பத்திசாலைக்கு கட்டுமானப்பணி தொடங்கிய விஷனரி, ஸ்பேஸ் எக்ஸ் (SpaceX) என்கிற துணிகர முயற்சியால் வின்னில் (நிஜ) ராக்கெட் செலுத்திய (நிஜ) செயல் தலைவர் என்று எலான் மஸ்க் கொண்டாடப் பட்டார்.

நிறுவனம் தொடங்கப்பட்டு பதினைந்து ஆண்டுகள் ஆனாலும் இன்னமும் லாபம் பார்க்காமல் இருந்தாலும், வாடிக்கையாளர்களும் சில முதலீட்டாளர்களும் டெஸ்லாவிற்கு உற்சாகமான ஆதரவையே கொடுத்துவந்திருக்கின்றனர். புதிய மாடலை அறிமுகப்படுத்தும் ஒவ்வொரு நிகழ்ச்சியிலும் எலான் மஸ்கின் ஒவ்வொரு புதிய அறிவிப்பையும் பல ஆயிரக்கணக்கான வாகன உரிமையாளர்கள் ஆர்ப்பரித்து வரவேற்றிருக்கின்றனர். மாடல் 3க்கான எதிர்பார்ப்பு எகிறி கிட்டத்தட்ட 400,000 வருங்கால டெஸ்லா உரிமையாளர்கள் ( என் நண்பன் உட்பட) ஆயிரம் டாலர் முன் பணம் செலுத்தி முன் பதிவு செய்தனர்.

டெஸ்லா நிறைய திருப்புமுனைகளை ஏற்படுத்தி ஏற்கனவே வாகன உற்பத்தியிலிருக்கும் சில கம்பெனிகளின் நெடு நாள் உறக்கத்தை நிறுத்தி விழித்துக்கொள்ள செய்தது என்பதை மறுப்பதற்கில்லை. மேலும் மின்சாரக் கார்களுக்கு ஒரு பெரிய சந்தை இருப்பதையும் அதற்கு பெரிய விலை கொடுக்கவும் வாடிக்கையாளர்கள் தயாராக இருப்பதையும் டெஸ்லா படம் பிடித்துக் காட்டியது. ஐஃபோன் காற்றிலேயே புதிய மென்பொருளை தரவிறக்கி தன்னைப் புதுப்பித்துக்கொள்வதைப் போன்று கார்களும் தங்களை எளிதாக மேம்படுத்திக்கொள்ள முடியும் என்பதை செய்துகாட்டிய முன்னோடி.

கார் ஓட்டுநர்களுக்கு – விபத்துகள் ஏற்படாமல் தடுப்பதற்கு – உதவும் அதி நவீன தொழில்நுட்பத்தைக் கண்டுபிடிக்க தீவிரமான போட்டியை டெஸ்லாவின் auto pilot தான் ஏற்படுத்தியது. இன்று ஜென்ரல் மோட்டார்ஸும், கூகுலின் கிளை நிறுவனமான வேமோவும் (waymo) auto pilotஐக் காட்டிலும் மிக நவீன மென்பொருளைத் தயாரித்துவிட்டனர்.

GMCruise

ஜெனரல் மோட்டார்ஸின் ட்ரைவிங் வீலே இல்லாத கார்!

இப்படியான தருணத்தில் எலான் மஸ்க் வேறொரு சர்ச்சையையும் கிளப்பினார். அது வீடுகளுக்கு சோலார் பேனல் தயாரிக்கும் கம்பெனியான சோலார் சிட்டியை, டெஸ்லா வாங்க முயற்சித்தது. சோலார் சிட்டியின் நிறுவனர் எலான் மஸ்கின் நெருங்கிய உறவினர்கள்.

சில முதலீட்டாளர்கள் இதை எதிர்த்து வழக்கு தொடர்ந்தனர் ஏனென்றால் சோலார் சிட்டியின் சேர்மேனாகவும் எலான் மஸ்க் இருந்தார். ஒரு கம்பெனியில் சேர்மேனாக இருந்து கொண்டு தன்னுடைய வேறு கம்பெனியை வைத்து அந்தக் கம்பெனியை வாங்குவதென்பது conflict of interest அதாவது உள்குத்து. இந்த வழக்கை தொடர்ந்து நடத்த கடந்த வாரம் ஒரு நீதிபதி அனுமதி அளித்து விட்டார்.

எலான் மஸ்க் இந்த வருடத்திற்குள் செய்து முடிக்க வேண்டிய வேலைகளை வைத்து அவருக்கான சம்பளத்தை ஜனவரியில் அறிவித்தது டெஸ்லா. எல்லா இலக்குகளையும் அவர் அடைந்தால் அவருக்கு 50 பில்லியன் டாலர் மதிப்புள்ள ஷேர்ஸ் கிடைக்கும்.

ஆனால் டெஸ்லா தொடர்ச்சியாக அதன் இலக்கை அடையமுடியவில்லை. 2017இல் மாடல் 3 வெளிவந்து, 2018 இல் 500,000 கார்கள் விற்கப்படும் என்று மஸ்க் சொன்னார். பின்னர் 2017இல் 100,000 என்று குறைத்துக் கொண்டார். பின்னர் அதிலிருந்தும் பேக் அடித்து கடந்த ஆகஸ்ட் மாதம் டிசம்பருக்குள் மதந்தோறும் 20,000 கார்கள் தயாரிக்க முடியும் என்றும் பொதுமக்களுக்கு உற்பத்தி குறித்த எந்தக் கவலையும் தேவையில்லை என்று சொன்னார்.

ஆனால் கடந்த ஆண்டின் நான்காவது காலாண்டில் டெஸ்லா 2424 மாடல் 3 கார்களே தயாரித்தது. சமீபத்திய இலக்கில் வாரத்திற்கு 2500 மாடல் 3 கார்கள் தயாரிக்க முடியும் என்று சொல்லியிருக்கிறது. இந்த வருடம் முதல் காலாண்டில் எவ்வளவு உற்பத்தி நடந்திருக்கிறது என்று ஏப்ரல் முதல் ஒரு வாரங்களில் தெரிந்துவிடும்.

மாடல் 3 தான் மிக முக்கியம். டெஸ்லா உற்பத்தியைப் பெருக்கி விற்பனையைக் கூட்டி வருவாயை பெருக்க வேண்டும், அப்பொழுதுதான் வாங்கின கடனை அடைத்து முதலீட்டாளர்களுக்கு பணத்தை திருப்பித் தரமுடியும். மேலும் டெஸ்லாவின் அடுத்த இலக்கான தானியங்கி லாரிகளில் முதலீடு செய்ய முடியும்.

முதலீட்டாளர்களிடம் ரெண்டு பில்லியன் டாலர்கள் பெற்றால் தான் உற்பத்திக்கும் முதலீட்டுக்கும் கடனை அடைப்பதற்கும் போதுமானதாக இருக்கும் என்று மூடீஸ் கணக்கிட்டுள்ளது. இந்த வருடத்தின் இருதியில் 200 மில்லியன் டாலரும் 2019 இன் தொடக்கத்தில் 900 மில்லியன் டாலரும் மாற்றத்தக்க பத்திரங்களாக டெஸ்லா வைத்திருக்கிறது.

இந்த வருடக் கடைசியில் நிறைய பணம் டெஸ்லாவுக்குத் தேவைப் படும் என்பது நிச்சயம். சமாளிக்குமா டெஸ்லா?

H&M இல் $4.3 பில்லியன் மதிப்புள்ள விற்காத துணிகள்

H&M இல் 4.3 பில்லியன் டாலர் மதிப்புள்ள உடைகள் விற்காமல் இருக்கின்றன. விமர்சகர்கள் ,H&M இன் ஆபரேஷன்ஸ் சரியாக இருக்கிறதா என்று கேள்வி எழுப்புகின்றனர்.

இணையத்தில் ஃபேஷன் வர்த்தகம் மிக வேகமாக விற்கும். கடைகளில் விற்பனைக்குத் தகுந்தார்ப்போல வைத்திருக்கும் உடைகளை மாற்றிக்கொண்டேயிருக்க வேண்டும். இப்படியிருக்கும் பொழுது விற்காத சில அடுக்கு துணிகள் கூட பிரச்சனையே.

அப்படியென்றால் விற்காத டாலர் 4.3 பில்லியன் மதிப்புள்ள குவியல் குவியலான துணிகள் மற்றும் அணிகலன்கள்? இதுதான் விற்காத விலை போகாத சரக்குளை வைத்திருக்கும் ஸ்வீடிஷ் ஃபேஷன் நிறுவனமான H&M சந்தித்துக்கொண்டிருக்கும் பிரச்சனை.

செவ்வாய்க்கிழமை வெளியான காலிறுதி ரிப்போர்ட்டில் இதை H&M கோடிட்டுக் காட்டியிருந்தது. கடுமையான போட்டியையும் மிக வேகமாக மாறிக்கொண்டிருக்கும் நுகர்வோரின் தேவைகளுக்கேற்பவும் H&M ஈடுகொடுக்க முடியுமா என்ற கேள்வி எழுகிறது.

விற்காத துணிகளின் குவியல் போன வருடத்தின் கடைசிக் காலிறுதி ரிப்போர்ட்டில் எதிர்பார்க்காத அளவு விற்பனையில் வீழ்ச்சி என்று H&M குறிப்பிட்ட பொழுது வெளிச்சத்துக்கு வந்தது. ஸ்டாக்ஹோம்மின் மேற்கே ஒரே ஒரு பெண்கள் துணிக்கடையாக ஆரம்பித்து இப்பொழுது 4700 கடைகளாக அசுர வளர்ச்சியடைந்திருக்கும் H&Mக்கு இந்த இருபது வருடங்களில் இதுவே முதல் வீழ்ச்சி.

நுகர்வோர் கூட்டமாக இருக்கிற கடைகளை விடுத்து ஆன்லைன்னிலோ அல்லது விலைக் குறைந்த வேறு கடைகளுக்கோ சென்றது தான் பிரச்சனையா?

H&M தான் உலகத்தின் மிகப்பெரிய துணி உற்பத்தியாளர். நூறு மில்லியன் கணக்கில் ஆண்டு தோறும் துணி உற்பத்தி செய்கிறது. வாஸ்ட்டிரஸ் என்கிற ஊரில் – முதல் கடை ஆரம்பித்த ஊர் – இருக்கும் மின் ஆலை H&Mஇல் உற்பத்தியாகும் குறைபாடுள்ள விற்கமுடியாத துணிகளை வைத்து மின்சாரம் – ஒரு பகுதி – தயாரிக்கிறது என்றால் உற்பத்தியாகும் துணிக்குவியல்கள் எவ்வளவு இருக்கும் என்று எண்ணிப்பார்த்துக்கொள்ளுங்கள்.

ஏன் விற்காத சரக்கின் அளவு அதிகமாக இருக்கிறது என்று கேட்டபொழுது H&Mஇன் சீஃப் எக்ஸிக்கியூட்டிவ் ஆஃபீசர் நாங்கள் புதிதாக 220 கடைகள் தொடங்கப் போவதாகவும் மேலும் ஆன் லைன் வர்த்தகத்தை விரிவு படுத்தப் போவதாகவும் தெரிவித்தார். நிறுவனத்தின் செயல்பாட்டு இலாபம் 62 சதவிகிதம் இந்த ஆண்டின் முதல் மூன்று மாதங்களில் வீழ்ச்சி கண்டது. ஸ்டாக்ஹோல்ம் பங்குச் சந்தையில் 2005 இலிருந்து கீழிறங்காத அளவுக்கு விலை சரிந்தது.

ஆப்பிரிக்காவில் H&M, “காட்டிலிருக்கும் குரங்குகளில் அழகான குரங்கு” என்கிற வாசகம் பொதித்த ஹூடட் டீ சர்ட் அணிந்த கருப்பின சிறுவன் நடித்த விளம்பரத்தை ஒளிபரப்பியது. இதனால் தென் ஆப்பிரிக்கா முழுவதும் போராட்டம் வெடித்தது. நெட்டிசன்கள் கழுவி ஊற்றவும் H&M தென் ஆப்பிரிக்காவில் கடைகளை மூட வேண்டியதாயிற்று. H&M சந்தித்துவரும் தொடர் பிரச்சனைகளில் இதுவும் ஒன்று.

ஐரோப்பாவில் H&M மற்றும் இன்னபிற ஃபேஷன் நிறுவனங்கள் அமேசானின் வருகையை திகிலோடு எதிர்பார்த்து, அமேசானை எப்படி எதிர்கொள்வது என்று மண்டையைக் குடைந்து வருகின்றன.

2000 ஆம் ஆண்டிலிருந்தே ஃபேஷன் நிறுவனங்களுக்கு (ASOS,H&M மற்றும் ZARA வின் உரிமையாளர் Inditex) விற்பனை எகிறி அடித்தது. நடைமுறையிலிருக்கும் ஃபேஷனை வைத்து மிக விரைவாக துணி உற்பத்தி செய்து இந்நிறுவனங்கள் மிகுந்த லாபம் சொல்லியடித்தன. ஆனால் கடந்த சில மாதங்களாக மில்லினியல்ஸின் நுகர்வுமுறை ஆடம்பர, விலை உயர்ந்த ஆடைகளை நோக்கிச் சென்றதனாலேயும் சீன ஆடம்பர நுகர்வோர் மீண்டு வந்ததாலேயும் விலை குறைந்த ஃபேஷன் நிறுவனங்கள், விற்பனையில் பெரிய மாற்றங்கள் செய்ய வேண்டிய நிலைக்குத் தள்ளப் பட்டன.

ஸ்மார்ட் ஃபோன் உலகத்தில் விரல் நுனியில் அந்த அந்த நொடியில் மாறிக்கொண்டிருக்கும் ஃபேஷனை வாட்ஸாப்பில் நண்பர்கள் பகிர்ந்த மாத்திரத்தில் வாங்கத் துடிக்கும் உலகமாக சட்டென்று மாறிவிட்டது.

ASOS ஆன்லைனில் மட்டுமே விற்பனை செய்கிறது, Inditex கூட ஆன்லைன் வர்த்தகத்தை விரிவாக்கிவிட்டது. ஆனால் H&M மட்டுமே தேங்கி விட்டது.

நீவ் கேப்பிடலின் நிறுவனர் ராகுல் ஷர்மா H&M “ஸ்லோமோஷன்” வீழ்ச்சியிலிருக்கிறது என்கிறார்.

ஆனால் H&M தங்களிடம் திட்டம் இருக்கிறது என்று சொல்லுகிறது. விற்காமல் கிடக்கும் துணிக்குவியலை விலையை மிகவும் குறைத்து விற்றுவிடுவோம் என்றும் ஆன் லைன் வர்த்தகம் இந்த ஆண்டு 25 சதவிகிதம் விரிவடையும் என்றும் கூறியிருக்கிறது.

Ola Uber Grab

ஓலா கேப்ஸ் அதன் போட்டியாளரான உபரை வாங்க இருப்பதாக ஒரு செய்தி உலவுகிறது. இந்த ஒப்பந்தத்தை முன்னின்று செய்வது இரு நிறுவனங்களிலும் முதலீடு செய்திருக்கிற சாஃப்ட் பேங்க். சாஃப்ட் பேங்க் இரு நிறுவனத்திலும் முதலீடு செய்திருப்பதால் இருமுறை பணம் செலவழிக்க விரும்பவில்லை. ஓலா ஆஃபர் கொடுத்தால், உபரும் வேறு வழியில் ஆஃபர் கொடுக்க வேண்டும். இரு நிறுவனங்கள் போட்டி போட்டுக்கொண்டு ஆஃபர்கள் வாரிக்கொடுத்தால் இரு நிறுவனங்களும் போட்டி போட்டிக்கொண்டு வாடிக்கையாளர்களை அள்ளிக்கொள்ளும்.

ola-uber

கடைசியில் லாபம் யாருக்கு? சாஃப்ட் பேங்குக்கு. ஆனால் ஒரு கட்டத்தில் வாடிக்கையாளர்கள் கிடைத்துவிட்ட பிறகு தினம் தினம் அவர்கள் இந்த நிறுவனத்தின் சேவையைப் பயன்படுத்த ஆரம்பித்த பிறகு இந்த நிறுவனங்களின் சேவை அவர்கள் அன்றாட வாழ்வில் ஒரு அங்கமாகிவிட்ட பிறகு முதலீட்டாளர்கள் தங்களின் முதலீட்டைக் குறைத்து லாபத்தைக் கூட்ட வேண்டும். அப்பொழுதுதான் போட்ட காசை எடுக்க முடியும். என்ன இருந்தாலும் எப்படி செலவுசெய்தாலும் யார் செலவுசெய்தாலும் பணம் சாஃப்ட் பேங்கின் பணம் தான். அவர்களுக்கு ஓலாவும் உபரும் இணைவது மிகவும் முக்கியம் – போட்ட பணம் திரும்பக் கிடைக்க வேண்டும்.

ubergrab

மார்ச் 26இல் உபர் கிழக்காசியாவின் தனது பிஸினஸை சிங்கப்பூர்-மலேசியாவில் இருந்து செயல்படும் க்ராபிற்கு விற்றுவிட்டது. இணைந்த மொத்த பிஸினஸில் உபருக்கு 27.5% பங்கு கிடைக்கும். ஜப்பானின் பில்லியனரான மசாயோசியின் மகனின் சாஃப்ட் பேங்க், உபரில் செய்த தனது சமீபத்திய முதலீட்டின் மூலம், உபரில் முதன்மை முதலீட்டார் ஆனது. உபர் மற்றும் க்ராபின் இந்த ஒப்பந்தத்தில் சாஃப்ட் பேங்கே வின்னர்.